1Cor 3 | KhmKCB | STEP | បងប្អូន អើយ ! ខ្ញុំ មិន អាច និយាយ ទៅកាន់ អ្នករាល់គ្នា ដូច ជា មនុស្ស ខាង វិញ្ញាណ បាន ទេ ប៉ុន្តែ ត្រូវនិយាយ ដូចជា មនុស្ស ខាង សាច់ឈាម វិញ គឺ ដូចជា និយាយទៅកាន់ ទារក នៅក្នុង ព្រះ គ្រិស្ដ

1 Corinthians 3

1 បងប្អូនអើយ! ខ្ញុំមិនអាចនិយាយទៅកាន់អ្នករាល់គ្នាដូចជាមនុស្សខាងវិញ្ញាណបានទេប៉ុន្តែត្រូវនិយាយដូចជាមនុស្សខាងសាច់ឈាមវិញគឺដូចជានិយាយទៅកាន់ទារកនៅក្នុងព្រះគ្រិស្ដ 2 ខ្ញុំបានឲ្យទឹកដោះអ្នករាល់គ្នាផឹកមិនមែនអាហាររឹងទេដ្បិតអ្នករាល់គ្នាមិនទាន់អាចបរិភោគបានឡើយហើយឥឡូវនេះក៏នៅតែមិនអាចដែរ 3 ដ្បិតអ្នករាល់គ្នានៅតែជាមនុស្សខាងសាច់ឈាមព្រោះមានសេចក្ដីច្រណែននិងការឈ្លោះប្រកែកនៅក្នុងចំណោមអ្នករាល់គ្នា។ តើអ្នករាល់គ្នាមិនមែនជាមនុស្សខាងសាច់ឈាមហើយរស់នៅតាមបែបមនុស្សទេឬ? 4 ដ្បិតពេលម្នាក់និយាយថាខ្ញុំជាសិស្សរបស់លោកប៉ូលហើយម្នាក់ទៀតថាខ្ញុំជាសិស្សរបស់លោកអ័ប៉ុឡូសតើអ្នករាល់គ្នាមិនមែនជាមនុស្សទេឬ? 5 ដូច្នេះតើលោកអ័ប៉ុឡូសជាអ្វី? ហើយលោកប៉ូលជាអ្វី? គឺជាអ្នកបម្រើដែលនាំឲ្យអ្នករាល់គ្នាជឿហើយម្នាក់ៗធ្វើតាមដែលព្រះអម្ចាស់ប្រទានឲ្យ។ 6 ខ្ញុំបានដាំលោកអ័ប៉ុឡូសបានស្រោចទឹកប៉ុន្តែព្រះជាម្ចាស់ធ្វើឲ្យដុះឡើង 7 ដូច្នេះអ្នកដាំនិងអ្នកស្រោចទឹកមិនសំខាន់ទេគឺព្រះជាម្ចាស់ដែលជាអ្នកធ្វើឲ្យដុះឡើងទេទើបសំខាន់ 8 ឯអ្នកដាំនិងអ្នកស្រោចទឹកដូចគ្នាទេគឺម្នាក់ៗនឹងទទួលរង្វាន់តាមពលកម្មរបស់ខ្លួន 9 ដ្បិតយើងជាអ្នកធ្វើការរួមគ្នារីឯអ្នករាល់គ្នាជាស្រែរបស់ព្រះជាម្ចាស់និងជាដំណាក់របស់ព្រះជាម្ចាស់។ 10 ស្របតាមព្រះគុណរបស់ព្រះជាម្ចាស់ដែលបានប្រទានឲ្យខ្ញុំខ្ញុំបានចាក់គ្រឹះដូចជាជាងដ៏ចំណានម្នាក់ហើយមានអ្នកផ្សេងទៀតសង់ពីលើនោះប៉ុន្តែម្នាក់ៗត្រូវប្រយ័ត្នអំពីរបៀបដែលខ្លួនសង់លើគ្រឹះនោះ 11 ដ្បិតគ្មានអ្នកណាម្នាក់អាចចាក់គ្រឹះផ្សេងទៀតបានទេក្រៅពីគ្រឹះដែលបានចាក់រួចហើយគឺជាព្រះយេស៊ូគ្រិស្ត។ 12 បើអ្នកណាម្នាក់យកមាសប្រាក់ត្បូងដ៏មានតម្លៃឈើចំបើងឬស្បូវមកសង់លើគ្រឹះនោះ 13 កិច្ចការរបស់គេម្នាក់ៗនឹងបង្ហាញឲ្យឃើញដ្បិតនឹងធ្វើឲ្យដឹងច្បាស់នៅថ្ងៃចុងក្រោយពីព្រោះកិច្ចការនោះត្រូវបង្ហាញឲ្យឃើញតាមរយៈភ្លើងគឺភ្លើងនឹងពិសោធកិច្ចការរបស់គេម្នាក់ៗឲ្យឃើញជាយ៉ាងណា 14 បើកិច្ចការរបស់អ្នកណាម្នាក់ដែលបានសង់លើគ្រឹះនៅស្ថិតស្ថេរអ្នកនោះនឹងទទួលបានរង្វាន់ 15 បើកិច្ចការរបស់អ្នកណាម្នាក់ត្រូវឆេះអស់អ្នកនោះនឹងត្រូវខាតបង់វិញប៉ុន្តែខ្លួនគាត់នឹងទទួលបានសេចក្ដីសង្គ្រោះដូចជាទើបឆ្លងកាត់ភ្លើងដូច្នេះដែរ 16 តើអ្នករាល់គ្នាមិនដឹងទេឬថាអ្នករាល់គ្នាជាព្រះវិហាររបស់ព្រះជាម្ចាស់ហើយព្រះវិញ្ញាណរបស់ព្រះជាម្ចាស់គង់នៅក្នុងអ្នករាល់គ្នា? 17 បើអ្នកណាម្នាក់បំផ្លាញព្រះវិហាររបស់ព្រះជាម្ចាស់ព្រះជាម្ចាស់នឹងបំផ្លាញអ្នកនោះដ្បិតព្រះវិហាររបស់ព្រះជាម្ចាស់បរិសុទ្ធគឺជាអ្នករាល់គ្នានេះហើយ។ 18 ចូរកុំបញ្ឆោតខ្លួនឯងឡើយបើអ្នកណាម្នាក់នៅក្នុងចំណោមអ្នករាល់គ្នាស្មានថាខ្លួនមានប្រាជ្ញានៅក្នុងលោកិយនេះចូរឲ្យអ្នកនោះត្រលប់ជាល្ងង់ខ្លៅចុះដើម្បីឲ្យគាត់មានប្រាជ្ញា 19 ព្រោះប្រាជ្ញារបស់លោកិយនេះជាសេចក្ដីល្ងង់ខ្លៅនៅចំពោះព្រះជាម្ចាស់ដ្បិតមានសេចក្ដីចែងទុកថា៖ «ព្រះអង្គចាប់ពួកអ្នកប្រាជ្ញដោយសារល្បិចកលរបស់គេ» 20 ហើយមានចែងទុកទៀតថា៖ «ព្រះអម្ចាស់ជ្រាបថាគំនិតរបស់ពួកអ្នកប្រាជ្ញគ្មានប្រយោជន៍ឡើយ» 21 ដូច្នេះកុំអួតអំពីមនុស្សឡើយដ្បិតអ្វីៗទាំងអស់ជារបស់អ្នករាល់គ្នា 22 មិនថាលោកប៉ូលលោកអ័ប៉ុឡូសលោកកេផាសពិភពលោកនេះជីវិតសេចក្ដីស្លាប់អ្វីៗនាបច្ចុប្បន្នឬអ្វីៗនាអនាគតគឺជារបស់អ្នករាល់គ្នាទាំងអស់ 23 ហើយអ្នករាល់គ្នាជារបស់ព្រះគ្រិស្ដហើយព្រះគ្រិស្ដជារបស់ព្រះជាម្ចាស់។